Okkar heimur

Okkar heimur starfar í þágu barna sem eiga foreldra með geðrænan vanda og veitir fjölskyldum fræðslu og stuðning, ásamt því að vinna markvisst með fagaðilum. Vegna eðlis starfseminnar þarf Okkar heimur að veita öfluga fræðslu og upplýsingamiðlun til margra markhópa.

Uppbygging nýs vefs tekur mið af þessari áskorun og gerir þessum mismunandi þörfum góð skil með skýrum skilaboðum og fræðslu til hvers hóps um sig. Sérstök áhersla er lögð á að kynna fjölskyldusmiðjur og stuðningshópa Okkar heims.

Kolibri vann nýja mörkun fyrir stafræna miðla með Okkar heimi. Við vildum að ásýndin væri vinaleg og aðgengileg, með ákveðna mýkt en skýran ramma. Litirnir eru fjölbreyttir án þess að vera óreiðukenndir og leturgerðir voru valdar með aðgengi og læsileika í huga. Viðfangsefnið getur verið erfitt fyrir fólk og þess vegna fannst okkur mikilvægt að vefurinn í heild væri einnig með mildan og látlausan heildarsvip.

Markhópar Okkar heims fyrir fræðslu og stuðning eru fimm - yngri börn, ungmenni, foreldrar, aðrir aðstandendur og fagfólk.

Vefurinn inniheldur hnitmiðaðar fræðslugreinar fyrir alla þessa markhópa, til að styðja og leiðbeina á erfiðum tímum.

Fallegar teikningar frá Söru Rós Guðmundsdóttur, sem starfar sem sjálfboðaliði fyrir samtökin, leika stórt hlutverk í ásýnd samtakana. Teikningarnar vísa í barnæskuna með litagleði ásamt mjúkum og óreglulegum línum. Meira er um teikningar af hlutum og leikföngum á síðum fyrir börn, en abstrakt form eru ráðandi á síðum fyrir eldri markhópa.