Íslandsbanki

Fyrsti áfanginn var að hanna og þróa nýjan vef bankans.  Heildstæð stafræn mörkun var unnin af hönnuðum Kolibri, í samstarfi við Brandenburg. Á sama tíma var grunnur lagður að nýju hönnunarkerfi.

Hönnunarkerfið var mátað við ólíkar stafrænar lausnir, meðal annars við frumgerð að nýju Íslandsbanka-appi sem kom í stað tveggja eldri appa. Margar hugmyndir voru prófaðar við endurhönnun appsins en á endanum var afhent sannreynd frumgerð. Núverandi app byggir enn á þessum grunni.

Allt hönnunarferlið var notendamiðað og byggðist á víðtæku samstarfi við starfsfólk bankans þvert á svið og deildir. Hönnun vefsins var stöðugt prófuð og betrumbætt með aðkomu bæði notenda og starfsfólks.

Þessi vinna leiddi til mótunar nýrrar vefstefnu sem byggði á gögnum um notkun og viðhorf viðskiptavina og starfsfólks. Stórar ákvarðanir voru teknar í kjölfarið um upplýsingahögun og tækniumhverfi. Leiðarljósið var að einfalda bæði efnisumsjón og efnistök, gera alla þjónustu bankans aðgengilegri fyrir viðskiptavini, og tala til fólks á afslappaðri og mannlegri máta.

Vefurinn fór í loftið á slóðinni islandsbanki.is í janúar 2019, og var í raun frumsýning á nýrri stafrænni mörkun bankans. Stafræn upplifun var orðin fersk og nútímaleg – í takt við upplifun í útibúum bankans.

Verkefnið er skýrt dæmi um innleiðingu stefnu þar sem mótun á stafrænni mörkun fór fram samhliða lykilverkefni á borð við nýjan vef og app. Með því tókst að draga saman áður sundurslitnar stafrænar lausnir og skapa heildstæða og samræmda notendaupplifun.

Frá því að vefurinn var settur í loftið hefur Íslandsbanki, í samstarfi við Hugsmiðjuna, haldið áfram markvissri þróun og unnið hefur verið að ítrun vefsins og eflingu stafrænnar þjónustu í takt við línuna sem var lögð.