Alcoa Fjarðaál • Hönnunarsprettur

Stafræn lausn sem sparar milljarða.

Skautskipti eru eitt mannfrekasta verkið í starfsemi Alcoa Fjarðaáls á Reyðarfirði. Til að tryggja jafna straumdreifingu og skilvirkni rafgreiningar á áli er mikilvægt að nákvæmni í skautskiptum sé sem allra mest og frávikum haldið í lágmarki. Kranar sem notaðar eru við skautskipti hafa möguleika á að mæla nákvæmni og gæði skautskipta. Þessar gæðamælingar hafa ekki verið settar fram fyrir starfsfólk á aðgengilegan og auðskiljanlegan hátt. Því var erfitt fyrir starfsfólkið að bregðast við, bæta vinnuferla og læra af mælingunum.

Bætt aðgengi að gögnum

Alcoa Fjarðaál hóf samstarf með Kolibri sem fólst í notendarannsóknum til að skilja starfsemina og þarfir og væntingar endanotenda, sem eru starfsfólk í skautskiptum kerskála. Í framhaldinu var haldinn hönnunarsprettur þar sem markmiðið var að bæta aðgengi að gögnum, auka upplýsingaflæði og veita virka endurgjöf byggða á mælingunum. Þetta allt þurfti svo að koma saman í notendavænni stafrænni lausn.

Hönnunarspretturinn samanstóð af starfsfólki Kolibri og Alcoa Fjarðaáls sem unnu saman í þrjá daga til að ramma inn áskoranirnar, þróa hugmyndir, skissa og setja saman frumgerð sem var loks hægt að sýna starfsfólki og fá endurgjöf.

Aukið upplýsingaflæði.

Valdefling starfsfólks

Sterk sýn í gegnum alla vinnuna var að veita starfsfólki kerskála eignarhald á eigin mælingum um frammistöðu sinnar vinnu. Það var gert með því að gefa þeim færi á að sýsla með eigin gögn, aðlaga þau að sínum þörfum, fylgjast með mælingum í rauntíma og greina mynstur. Einnig gat starfsfólk gefið endurgjöf á mælingarnar, komið með útskýringar, leiðréttingar og þ.a.l. bætt gæði mælinganna.

Notendaprófanir á frumgerð lausnarinnar sýndu fram á aukinn árangur í starfi, en með lausninni gat starfsfólk brugðist hraðar við sem skilar sér í betri vöru og meiri gæðum. Einnig veitti lausnin starfsfólki hvatningu fyrir vel unnin störf og jók starfsánægju.

Mælanleg markmið.

Hratt í loftið

Afurðin er app þar sem starfsfólk kerskála getur séð frammstöðu kerskála myndrænt, fylgt eigin frammistöðu sem og frammistöðu vaktarinnar í heild sinni og borið saman. Einnig getur starfsfólkið rakið frávik og fengið fræðslu í formi kennslumyndbanda. Stór nýjung var markmiðasetning, en lausnin gefur starfsfólki kleift að setja sér mælanleg markmið og veitir þeim hvatningu á skemmtilegan og uppörvandi hátt. Allt þetta auðveldar lærdóm og veitir starfsfólki endurgjöf í rauntíma.

Fjarðaál sáu verðmæti lausnarinnar strax og komu henni í hendurnar á starfsfólki á nokkrum vikum. Lausnin leiðir til betri og hraðari framleiðslu, betri vöru hjá Alcoa Fjarðaáli og sparnaðar upp á milljarða íslenskra króna.

“Kolibri teymið leiddi okkur hjá Fjarðaáli af öryggi, fagmennsku og sköpunargleði við okkar fyrsta hönnunarsprett. Þeirra nálgun á vandamál í framleiðslu hjálpaði okkur af stað í stafræna vegferð þar sem framleiðslustarfsfólk og þeirra eigin markmið eru í forgrunni. Appið hefur verið valið sem alþjóðleg lausn sem verður í framtíðinni innleidd í verksmiðjur Alcoa á heimsvísu.”

María Ósk Kristmundsdóttir, framkvæmdastjóri fjárfestinga, framleiðsluþróunar og upplýsingatækni, Alcoa Fjarðaál.